HM í fótbolta og mansalsfaraldurinn

Munið þið eftir heimsmeistaramótinu í knattspyrnu sem haldið var árið 2006 í Þýskalandi?

Í aðdraganda mótsins virtist allt ætla um koll að keyra hjá femínistum sem vildu fullvissa okkur um að á meðan mótið stæði myndu 40.000 austur-evrópskar konur fluttar nauðugar viljugar til landsins og falboðnar ógeðslegum (karlkyns) gestum mótsins og það skv. áreiðanlegum rannsóknum alþjóðasamtakanna Coalition Against Trafficing in Women.

Sumir femínistar þóttust reyndar hafa fyrir því lærðar heimildir að fjöldinn myndi hlaupa á hundruðum þúsunda. Svíar gengu meira að segja svo langt að íhuga að sniðganga mótið að áeggjan umboðsmanns jafnréttismála Svíþjóðar, Claes Borgström. Þá létu íslenskir femínistar ekki sitt eftir liggja og sendu Þýska sendiráðinu og Knattspyrnusambandi Íslands eftirfarandi áskorun undir yfirskriftinni „Vændi er ekki íþrótt„:

„Í júní og júlí næstkomandi fer fram heimsmeistarakeppnin í fótbolta í Þýskalandi. Því miður hefur vændi verið lögleitt sem hver önnur atvinnugrein þar í landi og samkvæmt alþjóðasamtökunum Coalition Against Trafficing in Women er undirbúningur hafinn til að flytja inn 40.000 konur frá mið- og austur Evrópu. Þessar konur, eiga að „þjóna“ þeim körlum sem leggja leið sína á heimsmeistarakeppnina.

Með þessu er verið að blanda saman íþróttum og kynbundnu ofbeldi, ýta undir mansal og hlutgera konur sem kynlífsleikföng karlmanna. Vændi hefur alvarlegar líkamlegar og andlegar afleiðingar fyrir konur og aldrei er ásættanlegt að líkamar kvenna gangi kaupum og sölum. Við skorum á Knattspyrnusamband Íslands að mótmæla þeirri ofbeldisvæðingu sem á sér stað samhliða heimsmeistarakeppninni og koma þeim skilaboðum til FIFA. Einnig er skorað á þýsku ríkisstjórnina að axla félagslega ábyrgð, beita sér gegn mansali og öðru kynbundnu ofbeldi og lýsa því yfir að íþróttir og mannleg niðurlæging eigi ekki samleið.

Bríet – félag ungra femínista
Femínistafélag Íslands
Konur gegn limlestingu
Kvenfélagasamband Íslands
Kvennaráðgjöfin
Kvenréttindafélag Íslands
Neyðarmóttaka vegna nauðgunar
Prestur Innflytjenda
Rannsóknarstofa í kvenna- og kynjafræðum
Samtök kvenna af erlendum uppruna á Íslandi
Samtök um kvennaathvarf
Stígamót
UNIFEM á Íslandi
V-dagssamtökin“

Giggið gekk frábærlega hjá femínistunum sem voru að ná ágætis árangri í að mata heiminn á þeirri hugmynd að fyrrtar karlkyns fótboltabullur flykktust nú til þýskalands, ekki bara til að horfa á fótbolta heldur riðlast á ódýrum hórum á milli leikja.

Eftir mótið lét Evrópuráðið gera fyrir sig skýrslu um mansalsfaraldurinn. Skýrslan var unnin af nokkrum óháðum samtökum fyrir ráðið og niðurstaðan: Upp komst um 5 mansalstilfelli á meðan að mótið stóð.

Það er nú ekki nema 39.995 færri tilfelli en bjartsýnustu svartsýnisfemínistar höfðu spáð og aðeins 99,988% skekkja frá áætlunum. Orðað á annan hátt má segja að þær hafi haft 0,012% rétt fyrir sér að þessu sinni.

Vel gert!

SJ